Rwanda: Abantu bakuru bagiye kuzajya bahabwa imiti y’inzoka-RBC

Mu Rwanda bimaze kugaragara ko abantu bakuru nabo basigaye bibasirwa n’indwara z’inzoka zo mu nda, aho usanga umuntu umwe kuri babiri baba bazirwaye, bikaba byatumye Ikigo cy’igihugu gishinzwe ubuzima (RBC) gitangaza ko abantu bakuze nabo bagiye kujya bahabwa ibinini nk’uko abana bato babihabwa.

U Rwanda rwifatanyije n’ibindi bihugu kuri uyu wa Gatandatu kwizihiza umunsi wo kurwanya indwara zititaweho. Indwara z’inzoka zo mu nda zikaba ziza ku isonga mu zititaweho mu Rwanda

Umujyanama wa gahunda yo kurwanya indwara zititaweho muri RBC, Dr. Ruberanziza Eugène, yabwiye RBA ko ku rutonde rw’indwara 20 Ishami ry’Umuryango w’Abibumbye ryita ku Buzima, OMS, ivuga ko zititaweho, mu Rwanda uhasanga izigera ku 10 nubwo zitari ku kigero kimwe.

Mu ziza ku isonga harimo inzoka zo mu nda haba ku bana bato ndetse n’abakuru.

Yakomeje avuga ko mu nzoka zo mu nda hari izandura zinyuze mu kanwa zirimo, Ascalis bakunze kwita runwa mu Kinyarwanda, n’iyo bita mugugunnyi. Hari kandi n’izindi umuntu arwara zinjiriye mu ruhu nka munyunyuzi cyangwa Ankylostome, zikibasira cyane abantu bakunda kugendesha ibirenge ahandu handuye.

Yavuze ko ziba zageze mu butaka kubera abantu bitumye mu gasozi badafite imisarani. Yongeyeho ati “Ugize isuku ihagije, ukanywa amazi meza, ugakoresha ibikoresho bifite isuku, ntaho wahurira nazo.”

Mu Rwanda kandi hari aho usanga umuntu 1 ku bantu 2 arwaye inzoka zo mu nda ndetse ubushakashatsi bwa RBC bwo muri 2014 bwagaragaje ko mu bana bo mu mashuri abanza, 45% bari bafite inzoka zo mu nda.

Dr. Ruberanziza avuga ko iyo inzoka zitavuwe neza zigira ingaruka zikomeye ku buzima bw’uzirwaye.

Ati “Inzoka zo mu nda ni mbi cyane, ku bana zirabadidinza, bagakurizamo kugwingira, zituma batajya ku ishuri cyangwa se bagakurikira nabi, ibyo bikaba byatuma bava mu ishuri ndetse hari n’abazirwara zikabahitana.”

Yakomeje avuga ko babyeyi batwite ho zibatera kugira amaraso make, bigatuma abana bagwingira bakiri mu nda.

RBC ivuga kandi ko mu guhangana n’indwara z’inzoka, kuva muri 2008, u Rwanda rutanga nta kiguzi ibinini by’inzoka ku bana bato, iyi gahunda mu minsi iri imbere ikaba izagera no mu bantu bakuru.

Ishami ry’Umuryango w’Abibumbye ryita ku buzima, rivuga ko ku isi hari abantu miliyari 1 na miliyoni zirenga 700 barwaye indwara zidakunze kwitabwaho, ari yo mpamvu hatangijwe gahunda yihariye yo kwita kuri izo ndwara mu gihe cy’ imyaka 10 iri imbere uhereye ubu, aho abazirwaye bakenera ubuvuzi bagomba kugabanuka ku kigero cya 90%.

 

Leave a Reply

Your email address will not be published. Required fields are marked *