Uko byagenze: Impamvu yafunze abayoboraga Gereza ya Mageragere, “kwiba amafaranga y’umugororwa bakayinezezamo”

*Abayobozi 3 bayoboraga Gereza ya nyarugenge ubu bategereje icyemezo cy’Ubujurire
*Bashinjwa kwiba amafaranga miliyari 10Frw y’umunyamahanga ufungiye i Mageragere

Uwari Umuyobozi Mukuru wa Gereza ya Nyarugenge, CSP Kayumba Innocent (yasimbuwe na CSP KAMUGISHA Michel) na SP Ntakirutimana Eric wari umwungirije, na Chief Sgt Mutamaniwa Ephraim wari ushinzwe iperereza bamaze ukwezi kurenga batawe muri yombi ndetse barafungwa, bakekwaho kwiba asaga miliyari 10Frw y’umunyamahanga ufungiye i Mageragere bakinezezamo.

Aba bagabo baregwa ibyaha bitatu 1. Icyaha cyo kwiba  2.  Icyaha cyo kwinjira mu makuru abitse muri mudasobwa cyangwa urusobe rwazo n’icyaha 3. icyaha cyo kwiyitirira Umwirondoro utari uwawe.

Ibi byaha barabihakana, cyakora bakemera bimwe mu bikorwa bivugwa muri ibyo byaha.

Byagenze gute ngo ifaranga ry’umunyamahanga, Abayobozi ba gereza barigweho, batangire kurirya?

Ubushinjacyaha ku wa 22 Gashyantare 2021 rwareze aba bagabo bayobowe na CSP Kayumba Innocent Umuyobozi wa Gereza ya Mageragere, SP Ntakirutimana Eric wari umwungirije impamvu nkomezacyaha ku cyaha cyo kwiba, kwinjira mu makuru abitse muri mudasobwa cyangwa  urusobe rwazo no kwiyitirira umwirondoro utari uwawe bakoze ari Abayobozi muri Gereza ya Nyarugenge iri i  Mageragere.

Chief Sgt Mutamaniwa Ephraim wari ushinzwe iperereza (Intelligence officer), akurikiranyweho impamvu nkomezacyaha ku cyaha cyo Kwiba n‘icyo Kwinjira mu makuru abitse muri mudasobwa cyangwa  urusobe rwazo.

Ubushinjacyaha buvuga ko nyuma y’uko mu kwezi kwa Mutarama 2021 bimenyekanye ko  umufungwa w’umunyamahanga ufite Ubwenegihugu bw’Ubwongereza akaba afungiwe i Mageragere witwa KASSEM AYMAN MOHAMED, yahibiwe amafaranga agera kuri miriyari (9,144,300,000Frw icyo gihe niko yanganaga ubu ni miliyari 10Frw) ahwanye n’ama-Pound miliyoni 7.6 (£ 7,679,911), akuwe kuri Bank ikomeye ya Baclays hakoreshejwe Visa Debit Card ye iperereza ryasanze Abayobozi ba Gereza ya Nyarugenge baridagaduye muri ayo mafaranga.

Uko byagenze…

KASSEM AYMAN MOHAMED yari asanzwe akoresha iriya karita yo kubikuza agura ibintu bitandukanye birimo imiti yitwa (Insulin injection) n’ibyo kurya bitandukanye, yamara kubigura ikarita igahabwa Bugingo Eugène ukorera mu Ishami rya Gereza rishinzwe ibikorwa social i Mageragere.

Nyuma KASSEM AYMAN MOHAMED yongeraga gufata ikarita ye asubiye guhaha kuko yajyagayo kabiri mu kwezi. Yaherukaga gukoresha iriya karita ku italiki ya 18/08/2020.

Ierereza ryasanze amafaranga yari ku ikarita yaratangiye kwibwa kwezi kwa Nzeri 2020. BUGINGO Eugene ngo abisabwe n’umuyobozi wa Gereza ya Mageragere (icyo gihe),  CSP Innocent KAYUMBA,  yakuye iyo karita  aho yari ibitse biza kugaragara ko yaguriweho ibicuruzwa bitandutanye mu buryo bw’ikoranabuhanga (online buying) nyirayo atabizi, hakoreshejwe telefoni ya Gashema Faustin ufungiye muri iyo Gereza ya Mageragere, Ubushinjacyaha buvuga ko ari uburyo abaregwa bakoreshaga ngo bitagaragara ko ari bo baguze ibintu, bagakoresha sim card z’abafungwa zabikwaga na  Mutamaniwa Ephraim (Intelligence Officer).

Ubushinjacyaha buvuga ko Umuyobozi wa Gereza, CSP Innocent KAYUMBA yifashishije umufungwa witwa Amani Olivier uzwiho kugira ubumenyi mu bijyanye n’ikoranabuhanga (IT), amusaba gukura amafaranga kuri iyo karita ya AYMAN Muhamed, na we amusubiza ko bitakunda uretse kuba gusa yayikoresha agura ibintu bitandukanye mu buryo bw’ikoranabuhanga (online).

Ubwo ngo uwo mufungwa uzobereye muri IT yahereye aho yinjira muri konti y’uriya munyamahanga, hakoreshejwe ikarita ye hagurwa telephone SUMSUNG S8 n’ibindi bintu bitandukanye birimo biscuits (ibisuguti), juices (jus) n’ibindi  muri sosiyete yitwa “VUBA VUBA”,  ibizana ku Murenge wa Mageragere, byakirwa n’Umunyamabanga w’Umuyobozi wa Gereza witwa Uwamariya Marguerite, nyuma abigeza kwa CSP Innocent KAYUMBA.

Ubushinjacyaha busobanura ko tariki ya 17/09/2020, SP Eric NTAKIRUTIMANA, Umuyobozi wa Gereza wungirije (icyo gihe) na we akoresheje telephone 0782284404 y’umufungwa witwa HABIMANA David yatumije telephone yo mu bwoko bwa Samsung A71 igurwa Frw 450.000 n’inzoga zifite agaciro ka Frw 90.000 n’ibindi bintu birimo biscuits, jus n’amata.

Uyu ngo yaje gusinya kuri delivery note ya “VUBA VUBA” imuzaniye iyo telephone, akaba yarayitahanye ku taliki ya 4/02/2021.

Ubushinjacyaha busobanura kandi ko ku italiki ya 19/09/2020 Chief Sgt MUTAMANIWA Ephraim, wari ushinzwe iperereza muri Gereza ya  Nyarugenge i Mageragere, na we yategetse AMANI Olivier (wa mufungwa uzi ibya IT) kumugurira inzoga yo kunywa yo mu bwoko bwa JAMSON Whisky (100cl),  ifite agaciro ka Frw 27.000, system ikaba igaragaza ko yitangiye comande mu mazina ye akoresheje telephone n’imyorondoro bye.

Ubushinjacyaha bukomeza busobanura ko impamvu zikomeye zituma CSP Innocent KAYUMBA akekwaho ibyaha byavuzwe haruguru akurikiranyweho, ari uko n’ubwo abazwa mu Bugenzacyaha no Bushinjacyaha yabihakanye, ariko yemeye ko ibindi bintu byaguzwe yabihaye AMANI Olivier, agahakana telefoni SAMSUNG GALAXY Note 10 Lite yaguzwe  mu buryo bwavuzwe haruguru.

Ubushinjacyaha bukavuga ko kuko yabonye iperereza ryatangiye, yayirigishije ariko historique igaragaza ko iyo telephone iherukamo Sim card ye kuva taliki ya 23/10/2020 kugeza ku itariki ya 01/02/2021.

CSP Innocent KAYUMBA akavuga ko byakozwe byatewe n’uburangare yagize yizera ubumenyi umufungwa Amani Olivier yari yamugaragarije ko yabakorera Software yakoreshwa muri Social ya Gereza ya Mageragere.

Uwo mufungwa ngo yari yanabwiye CSP Innocent KAYUMBA ko yafungira imiyoboro Abanyamakuru bamwandikagaho, niko kumuha ibikoresho yamusabye birimo Laptop y’akazi na Telephone ye akoresha, n’indi telefoni ya kabiri ayisaba Mutamaniwa Ephraim arayizana, ndetse abasaba na Visa Card zigera kuri eshatu na zo barazimuha, nibwo Amani Olivier yashyizeho ibyo bikoresho byose abereka ko arimo gukora “tracking za message” n’ibiganiro by’Abanyamakuru n’iby’abandi bakozi bo muri Gereza ngo bagambaniraga Umuyobozi.

CSP Innocent KAYUMBA avuga ko nyuma yo kumenya ko Visa Card bamuzaniye akaziha umufungwa Amani Olivier ari iza Kassem yamusabye kuzisubizaho amafaranga yibweho ariko amubeshya ko yabikoze.

Ubushinjacyaha bugasobanura ko impamvu zikomeye zituma SP Eric NTAKIRUTIMANA akekwaho ibyaha byavuzwe haruguru akurikiranyweho, ari uko n’ubwo abazwa mu Bugenzacyaha no Bushinjacyaha yabihakanye, ariko yemeye ko ubwo yari yasigariyeho Direteur (CSP Innocent KAYUMBA) yagiye mu mahugurwa, Amani Olivier yamusabye ko yamuha serivice agahaha, aramwerera  anamutiza telephone, arangije amusaba ko na we amuhahira kuri ‘Bictoin azayamwishyura’, maze amugurira  telephone Sumsag A71 ya Frw 450 000.

Ibintu byafashwe na Ntakirutimana birimo telephone, ibindi abiha Amani Olivier, akaba yemera ko yasinye kuri Delivery Note.

Ubushinjacyaha burangiza busobanura kandi ko impamvu ikomeye zituma Mutamaniwa Ephraim akekwaho ibyaha byavuzwe haruguru akurikiranyweho, ari uko n’ubwo abazwa mu Bugenzacyaha no Bushinjacyaha abihakana avuga ko atari impamvu nkomezacyaha ku cyaha cyo Kwiba inzoga za Frw 27, 000, ngo anakoreshe telefini ye n’umwirondoro we agura nk’uko bigaragazwa na ‘Details for order record ID 158121, ariko yemera ko Umuyobozi wa Gereza yamusabye telephone na Sim card yari abitse z’abafungwa arazimuha amubwira ko bagiye kuzikoresha muri tracking y’abantu bakorana n’Umunyamakuru umwandika kandi ko yabitangiye raporo ku bamukuriye,  atigeze ahura na Amani Olivier ngo bapange impamvu nkomezacyaha ku cyaha cyo kwiba bakoresheje Visa Card ya Kassim Ayman.

Anemera gusa ko yigeze kumuha telefoni ye ngo ayimukorere, kandi ko yagize impungenge abonye Amani Olivier ahora mu biro bya CSP Kayumba Innocent, bituma  ashyiraho umukozi ngo amenye impamvu yabyo aza kwirukanwa.

Umutangabuhamya Mutabana Moses avuga ko Mutamaniwa Ephraim yamenye ko yibwe amafaranga kuri visa card ze  mu kwezi kwa 12/2020.

Ubushinjacyaha bugasaba ko CSP Kayumba Innocent, SP Ntakirutimana Eric na Chief Sgt Mutamaniwa Ephraim baba bafunzwe by’agateganyo mu gihe cy’ukwezi kumwe, bagafungirwa muri Gereza ya Rwamagana.

Abaregwa bahakanye ibyaha byose baregwa bavuga ko batamenye ko byakozwe kuko badafite ubumenyei mu bijyanye n’Ikoranabuhanga, bo n’ababunganira bagasaba ko bafungurwa by’agateganyo, bagakurikiranwa bari hanze kuko kugeza ubu bagifatwa nk‘abere.

Hashingiwe ku ngingo ya 19 y‘Itegeko Nshinga n’ingingo ya zitandukanye z’Itegeko ryerekeye imiburanishirize y’imanza z’inshinjabyaha, Abanyamategeko babunganira bavuze ko nta mpamvu zikomeye zihari zituma bakekwaho ibyo byaha, kandi n’ibyaha bakekwaho bidahanishwa igifungo kigeze ku myaka ibiri (2ans).

Gusa basaba ko Urukiko rubibonye ukundi, abaregwa bose bafungirwa muri Gereza ya Nyanza.

Icyemezo cy’Urukiko cya tariki 22 Gashyantare 2021

Rwemeje ko hari impamvu zikomeye zituma CSP Kayumba Innocent na  SP Ntakirutimana Eric bakekwaho impamvu nkomezacyaha ku cyaha cyo Kwiba, icyaha cyo Kwinjira mu makuru abitse muri muri mudasobwa cyangwa urusobe rwazo n’icyaha cyo Kwiyitirira umwirondoro bakurikiranyweho.

Rwemeje ko hari  impamvu zikomeye zituma Mutamaniwa Ephraim akekwaho impamvu nkomezacyaha ku cyaha cyo kwiba n’icyaha cyo kwinjira mu makuru abitse muri mudasobwa cyangwa urusobe rwazo akurikiranyweho.

Urukiko rwategetse ko CSP Kayumba Innocent, SP Ntakirutimana Eric na Mutamaniwa Ephraim bakurikiranwa bafunzwe by’agateganyo mu gihe cy’ukwezi kumwe muri Gereza yemewe (bajyanwe mu ya Mpanga mu Karere ka Nyanza).

Abaregwa barajuriye

Aba bari Abayobozi ba Gereza ya Mageragere bajuririye Icyemezo cy’urukiko rw’Ibanze mu minsi itanu nk’uko amategeko abiteganya, bajuririra Urukiko Rwisumbuye rwa Nyarugenge.

Urubanza rwabo rwaburanwe tariki 11 Werurwe 2021, ruzasomwa tariki 18 Werurwe 2021.

Src: Umuseke/Oasisgazette

Leave a Reply

Your email address will not be published. Required fields are marked *